A actuación, que conta cun orzamento de 616.000 euros, ten como finalidade modernizar unha infraestrutura que presenta problemas de accesibilidade e conxestión. Para levar a cabo esta intervención, o goberno local solicitará á Deputación da Coruña a cesión da estrada provincial DP-0512, asumindo así a súa xestión directa.
O plan de obra contempla a ampliación da calzada e das beirarrúas, ademais da renovación completa dos pavimentos e das redes de servizos. O deseño incorpora criterios de sustentabilidade e eficiencia enerxética, buscando un espazo máis funcional para a veciñanza.
Entre as melloras previstas destacan a renovación da iluminación pública, a instalación de novo mobiliario urbano, a creación dunha zona de contedores e a habilitación de paradas de autobús con marquesiñas en ambos os dous sentidos de circulación. Tamén se actualizará a sinalización horizontal e vertical para garantir a seguridade viaria.
