As concellarías de Deportes e Educación do Concello de Arteixo publicaron a oferta de prazas dispoñibles para actividades extraescolares do curso 2026-2027. O procedemento para solicitar estas prazas vacantes comezará o vindeiro 13 de xullo.
A publicación das prazas vacantes realizouse o pasado 8 de xullo na páxina web municipal. O prazo de preinscrición estará aberto dende o 13 ata o 24 de xullo. O impreso de solicitude poderá recollerse nas oficinas do Servizo Municipal de Deportes ou Educación, ou descargarse dende a web www.arteixo.org. As solicitudes deberán entregarse nestas mesmas oficinas ou enviarse por correo electrónico ás direccións deportes@arteixo.org e educacion@arteixo.org.
No caso de que o número de solicitudes sexa superior ás prazas ofertadas, procederase a un sorteo público. A asignación de prazas realizarase a partir da primeira letra do primeiro apelido, e terán preferencia as persoas empadroadas no Concello de Arteixo.
A exposición das persoas preinscritas será a partir do 31 de xullo na páxina web municipal, seguida dun prazo para a subsanación de erros do 3 ao 7 de agosto. A listaxe definitiva de persoas preinscritas publicarase o 10 de agosto.
O sorteo público está previsto para o 11 de agosto ás 11:00 h no Pazo dos Deportes de Arteixo. A listaxe de persoas admitidas publicarase a partir do 13 de agosto.
As persoas admitidas terán dende o 17 ata o 28 de agosto para formalizar a matrícula, debendo entregar o xustificante de pagamento exclusivamente no Servizo Municipal de Deportes ou Educación. De non facelo, a praza será anulada. Se quedasen prazas libres, as inscricións continuarán dende o 9 de setembro.
O calendario de actividades rexerase polo establecido pola Consellería de Educación, incluíndo as vacacións de Nadal, Entroido e Semana Santa. O pago do prezo público poderá efectuarse nas entidades bancarias habituais ou a través do TPV virtual na páxina web municipal.
