A candidatura conxunta destes tres municipios galegos busca financiamento da Comisión Europea para poñer en marcha 'Cognix', unha plataforma deseñada para entender, predicir e adaptar os concellos ás necesidades reais dos seus cidadáns. A iniciativa pretende converter estas localidades nas primeiras de Galicia en operar baixo unha 'gobernanza cognitiva e inclusiva'.

O proxecto 'Cognix' empregará a intelixencia artificial para recompilar e analizar millóns de datos abertos e públicos procedentes de redes sociais, dispositivos electrónicos e fluxos de movemento. O fin é monitorizar o uso que a poboación fai dos espazos públicos, como parques, centros sociais ou rúas.

O sistema segmentará os comportamentos detectados por perfís demográficos e de necesidades específicas, como nenos, maiores, persoas con mobilidade reducida ou cidadáns neurodiverxentes. Esta análise detallada permitirá aos concellos identificar con precisión onde son necesarias as inversións, adaptando os servizos e infraestruturas ás demandas reais, como a adecuación de parques infantís para unha franxa de idade específica.

A través dunha aplicación móbil personalizada, os veciños poderán interactuar co sistema. Esta ferramenta cruza as características do usuario co estado do municipio en tempo real, ofrecendo información útil para persoas con mobilidade reducida, hipersensibilidade sensorial ou neurodiverxencia, suxerindo rutas adaptadas e informando sobre afluencias para evitar aglomeracións.

O sector do comercio e a hostalaría tamén se beneficiará. As asociacións de comerciantes poderán unirse á plataforma para acceder a intelixencia agregada do seu contorno e recibir formación en 'hospitalidade inclusiva', co obxectivo de atraer e dirixir tráfico de clientes de alta calidade aos seus negocios.