Tres mozos sentan hoxe no banco dos acusados pola presunta implicación na morte de Yoel Quispe, que se produciu tras unha malleira multitudinaria na confluencia das rúas Juan Flórez e Sinfónica de Galicia.
O principal implicado é José Luis F., considerado o autor material da puñalada mortal e o único que permanece en prisión provisional. Confesou o crime nunha carta e pediu desculpas á familia. Xunto a el, sentaranse Yared G., como cooperador necesario por presuntamente facilitarlle a navalla, e Aarón L., acusado dun delito de encubrimento por supostamente ocultar a arma homicida, que nunca foi atopada.
A acusación particular, exercida pola familia de Yoel, solicita 25 anos de prisión para Jose Luis e Yared por asasinato, e tres anos para Aarón. O xuízo, que se prolongará ata o 19 de xuño, contará con xurado popular e a declaración de numerosos testemuños, incluídos sanitarios, policías e os médicos forenses.
A Fiscalía, pola súa banda, cualifica os feitos como homicidio e pide 14 anos de cárcere unicamente para José Luis, mentres que para os outros dous procesados aboga polo sobresemento, unha diferenza de criterios que marcou o proceso xudicial.
Paralelamente, outros dous mozos que participaron na agresión inicial aceptaron unha pena de nove meses de cárcere por un delito de lesións, nun acordo de conformidade que suspende a condena se non volven delinquir. O pacto inclúe unha compensación de 1.500 euros para a familia da vítima, un acordo co que a nai de Yoel, Maritza, mostrou a súa total disconformidade, reclamando que a morte do seu fillo non quede impune.
“"Esperamos xustiza, que as persoas responsables reciban a pena que merecen. A familia está bastante afectada, a vida non foi a mesma."
A plataforma Xustiza para Yoel, da que é portavoz Gabriela Frías, convocou unha concentración hoxe ás 10h fronte á Audiencia Provincial da Coruña para apoiar á familia, que insiste en que se faga xustiza para Yoel.
