A investigadora do Centro de Investigación en Tecnologías de la Información y las Comunicaciones (CITIC), centro da Rede CIGUS, e catedrática da Universidade da Coruña, María Amparo Alonso Betanzos, foi galardoada co Premio Nacional de Informática José García Santesmases. A entrega tivo lugar na décima edición dos Premios de Investigación da Sociedad Científica Informática de España (SCIE) e a Fundación BBVA.
Durante a súa intervención, Alonso, que traballa no desenvolvemento de modelos de “intelixencia artificial frugal” —capaces de acadar altos niveis de rendemento con menos recursos computacionais e menor impacto ambiental—, subliñou a importancia da orientación ética no desenvolvemento sostible desta tecnoloxía. "Necesitamos unha IA potente e innovadora, pero non a calquera prezo. Explicable cando o necesitemos, responsable por deseño e, sobre todo, unha tecnoloxía que poidamos comprender, adaptar e controlar", afirmou.
“"O futuro da IA non o determine só o que a tecnoloxía pode facer, senón tamén o que decidimos que debe facer."
O xurado destacou as súas contribucións pioneiras ao desenvolvemento dunha intelixencia artificial escalable, explicable e sostible, recoñecendo a súa traxectoria investigadora e docente e o seu papel na promoción da disciplina. A cerimonia celebrou o valor social da informática como ferramenta de empoderamento baixo un marco ético.
Nesta edición, tamén foron premiados José Hernández-Orallo (Premio Aritmel), Javier García Zubía (Premio Ramón Llull) e a empresa INSITU, spin-off da Universidade de Vigo (Premio Ángela Ruiz Robles). Ademais, recoñecéronse traballos de investigadores mozos en campos como a intelixencia artificial, a robótica e a realidade virtual.
