O Goberno municipal da Coruña avanza no plan para dotar ao aeroporto de Alvedro de novas rutas aéreas. Tras a recente licitación de conexións nacionais a destinos como Málaga, Bilbao, Valencia, Sevilla e Alacante, a seguinte fase centrarase na incorporación de voos internacionais.
O concelleiro de Turismo, Gonzalo Castro, confirmou que a adxudicación destas novas rutas internacionais está prevista para o próximo outono. Castro destacou que o obxectivo é establecer un proxecto "serio, estable e de futuro" que garanta a conectividade aérea necesaria para a terminal coruñesa.
O edil sinalou que se está a traballar na definición dun plan a medio e longo prazo para asegurar a estabilidade e a conectividade do aeroporto. "Estamos traballando na licitación da primeira fase, con conectividade interior, a nivel estatal. Abordaremos a segunda base, xa internacional, o próximo outono", declarou.
Respecto ás declaracións do responsable de Fly2Galicia, Gueorgui Popov, sobre a posibilidade de operar en Alvedro, Castro afirmou descoñecer os seus plans específicos. Non obstante, asegurou que o Concello está "aberto a escoitar a todos", pero recalcou a aposta municipal por un proxecto "serio, estable e de futuro" que achegue a conectividade que Alvedro precisa.
