O Colexio Oficial de Enxeñeiros Técnicos Forestais e Graduados en Enxeñaría Forestal e do Medio Natural (COITF) alertou sobre o elevado risco de incendios forestais durante a semana do 12 de agosto, coincidindo co eclipse solar en España. O colexio fixo un chamamento á prudencia e á necesidade de incluír de forma explícita a prevención de lumes na planificación do evento.
Aínda que valoran positivamente os traballos de coordinación das administracións, insisten en reforzar a prevención de incendios forestais. Suxiren que a planificación debe ir máis alá dos puntos de observación, prevendo escenarios de emerxencia, rutas de evacuación e accesos para medios de extinción.
O COITF considera "imprescindible" intensificar as mensaxes de prevención e autoprotección, priorizando os puntos de observación recomendados e evitando concentracións desordenadas en zonas forestais non preparadas. Subliñan que a coincidencia dun evento de gran afluencia cun alto risco de incendios pode xerar situacións complexas.
Pola súa banda, a Garda Civil despregará un operativo especial de seguridade en toda España con máis de 24.000 efectivos para garantir a seguridade en máis de 660 puntos de observación do eclipse solar total.
Este dispositivo tamén estará presente en Galicia, onde se espera unha importante afluencia de visitantes. Na provincia da Coruña, por exemplo, a Garda Civil prevé a súa presenza en ata 27 puntos, incluíndo praias como a de Gandarío, Cabanas, Magdalena, Alameda, Perbes, Praia Grande, e áreas como Boca do Río, Punta Seixo Branco, Faro de Mera, Praia de Pantín, o miradoiro do cantil de Loiba e o faro de Fisterra.
