A campaña “Un alento de vida”, parte das actividades programadas pola ADOS dentro do XII Outubro Saudable, está a percorrer os sete campus das tres universidades galegas co fin de sensibilizar á comunidade universitaria sobre a necesidade de doar sangue.
Ademais dos desprazamentos das unidades móbiles, a Axencia instalou unha xigante gota de sangue nos arredores dos centros educativos, onde se poden pegar globos como metáfora da doazón como unha segunda oportunidade de vida. Esta montaxe chegará ao INEF o vindeiro 13 de outubro, data na que tamén se disporá dunha mesa informativa sobre a doazón de medula ósea.
O obxectivo da Axencia para este curso académico é acadar 4.500 doazóns de sangue nos campus galegos. No curso 2025-2026, as tres universidades achegaron 4.605 doazóns, das cales o 35% (1.633) foron de doantes que doaban por primeira vez.
A ADOS agradeceu o compromiso dos reitorados das universidades galegas e da UDC Saudable, que facilitan que os estudantes coñezan os distintos xeitos de doazón, esenciais para o sistema público de saúde.
