As persoas interesadas poderán presentar as súas solicitudes ata o vindeiro 9 de novembro. O programa, impulsado polo Concello, busca favorecer a autonomía persoal e ofrecer unha alternativa de transporte adaptada ás necesidades dos beneficiarios. O crédito dispoñible repartirase a partes iguais, cun importe máximo individual de 1.000 €.
A concelleira de Benestar Social, Participación e Igualdade, Nereida Canosa, subliñou a relevancia deste recurso para quen atopa maiores dificultades de mobilidade. "O Bono Taxi permite que moitas persoas poidan realizar actividades cotiás, acudir a citas ou desprazárense pola cidade con maior autonomía. O Goberno municipal busca que as dificultades de mobilidade non supoñan un obstáculo engadido para participar na vida da Coruña", sinalou.
Para poder solicitar estas axudas, as persoas deben ser maiores de tres anos, residir e estar empadroadas na Coruña, e ter recoñecida oficialmente unha discapacidade que afecte gravemente á súa mobilidade e lles impida utilizar o transporte público colectivo. Tamén se esixe non ser titular dun vehículo e cumprir os límites económicos establecidos, fixados no 210 % do IPREM, ademais doutras condicións da convocatoria.
As solicitudes poden formalizarse de maneira telemática a través da sede electrónica municipal ou presencialmente nos rexistros municipais de María Pita, Fórum Metropolitano e Centro Sociocultural Ágora. Para iso, será necesario cubrir o modelo normalizado de solicitude (modelo 124) e achegar a documentación acreditativa pertinente. Toda a información detallada está dispoñible na páxina web municipal, na sección de Servizos Sociais.
