A delegada da Xunta na Coruña, Belén do Campo, acompañada polo alcalde de Abegondo, José Antonio Santiso, visitou hoxe o Concello para comprobar o traballo que están a desenvolver as 6 persoas contratadas a xornada completa. Esta iniciativa do Goberno galego busca fomentar o emprego e reforzar a prevención de incendios forestais e a conservación do medio rural.
As tarefas que realizarán estes traballadores inclúen limpeza de montes, xestión da biomasa e mantemento de espazos naturais. Ademais, Abegondo foi un dos concellos beneficiarios da figura do coordinador, creada este ano para reforzar a planificación e eficacia dos traballos de prevención de incendios forestais, supervisando o labor do persoal contratado.
A delegada autonómica destacou que este programa contribúe a ofrecer oportunidades laborais a persoas desempregadas, mellorando a súa empregabilidade e, ao mesmo tempo, reforza actuacións prioritarias para a protección do territorio.
No conxunto da provincia da Coruña, a Xunta financiou a contratación de 282 persoas en 82 concellos cun investimento superior aos 5 millóns de euros. Na comarca do Betanzos, 13 concellos recibiron preto de 755.000 euros para contratar a 45 desempregados.
O programa 'Galicia Suma Talento: Rural Activo' incorporou novidades este ano, como a figura do coordinador municipal de prevención de incendios para concellos adheridos ao convenio entre a Xunta e Seaga. Tamén se garantiu o mesmo número de contratacións que na convocatoria anterior para concellos afectados por grandes incendios forestais.
Ademais, o programa complétase cunha formación específica para os contratados en materias como prevención de incendios, uso de maquinaria forestal e seguridade, reforzando a súa cualificación e a protección do medio rural galego.
