A directora da Axencia Galega de Infraestruturas, María Deza, anunciou hoxe a licitación da fase 2.1 do Novo CHUAC, tras participar na comisión de seguimento da ampliación do complexo hospitalario. Nesta reunión tamén estiveron presentes a delegada territorial da Xunta na Coruña, Belén do Campo, a directora de Recursos Económicos do Sergas, Amparo Pousada, e o xerente da área sanitaria, Luis Verde.
Esta nova fase contemplará actuacións previas como demolicións e escavacións, movementos de terras e a xestión dos materiais naturais xerados. A previsión é adxudicar as obras antes de que remate o ano para comezalas canto antes. A fase 2.1 inclúe tamén a demolición de 17 vivendas unifamiliares en Curramontes e a xestión das redes de subministración existentes.
O xerente da área sanitaria da Coruña e Cee, Luis Verde, destacou que as obras avanzan con normalidade sen interferir na actividade asistencial, grazas á coordinación e planificación, con máis de 20 reunións celebradas nos últimos dous meses co equipo técnico e xefes de servizo.
A Fase 0.2, cun investimento duns 10 millóns de euros, inclúe melloras no interior do hospital como a reforma da unidade de diálise e reanimación, a creación dunha unidade de probas funcionais de pneumoloxía e área de rehabilitación cardíaca e respiratoria, a ampliación do ximnasio e da área de terapia ocupacional da unidade de lesionados medulares, e a ampliación da unidade de resonancia magnética cun novo equipo, cuxa instalación xa está adxudicada.
Ademais, deuse conta da finalización da escavación do Hotel de Pacientes, cun investimento de 1,2 millóns de euros, e da escavación da Torre Polivalente, necesaria para a construción do novo edificio administrativo. Tamén se informou da demolición este verán de 3 das 20 vivendas xa expropiadas, as máis próximas á futura Torre Polivalente.
No que respecta aos accesos ao CHUAC, céntranse na construción dun novo viaduto sobre a estrada AC-12. O investimento nos accesos ascende a 26 millóns de euros, dos cales o Concello asume 22,2 millóns a través do convenio coa Xunta.
