O Goberno galego busca aliviar o gasto das familias coa volta ao cole, mantendo o seu compromiso de blindar o apoio aos fogares con nenos en idade escolar. Este paquete de medidas, que inclúe tamén unha nova convocatoria para comedores escolares non xestionados pola Xunta, suporá un aforro estimado de 26,5 millóns de euros.
“"O seu goberno un ano máis seguirá blindando o apoio ás familias con nenos en idade escolar cun paquete de axudas en función da renda para apoiar a quen máis o necesita."
As axudas manterán o criterio de renda, priorizando ás familias con menos ingresos. Para o material escolar, as unidades familiares cunha renda per cápita igual ou inferior a 10.000 euros poderán recibir vales de 75 euros (para rendas de ata 6.000 euros) ou 60 euros (para rendas entre 6.000 e 10.000 euros). O alumnado en situación de garda ou tutela da Xunta, de educación especial ou con necesidades específicas de apoio educativo e unha discapacidade igual ou superior ao 33%, recibirá sempre o importe máximo.
O fondo solidario de libros continuará para os cursos de 3º de Primaria a 4º de ESO, onde os manuais son reutilizables. Por segundo ano, tamén se incluirán os estudantes do programa E-Dixgal, consolidando o modelo híbrido. Estímase que o fondo contará con máis de 510.000 manuais. Para acceder a estas axudas, será obrigatorio devolver os libros do curso anterior.
As axudas para a compra de libros están dirixidas ao alumnado de 1º e 2º de Primaria, así como a outros cursos de ensino obrigatorio cando non sexa posible usar o fondo. En Primaria, as contías serán de 240 euros ou 160 euros, segundo a renda. En ESO, os importes ascenden a 270 euros ou 180 euros. O alumnado en garda ou tutela da Xunta recibirá sempre o tramo máximo, e os alumnos con educación especial ou discapacidade igual ou superior ao 33% que non poidan usar o fondo recibirán 300 euros para libros ou material específico.
Ademais, as familias que superen os limiares de renda poderán acollerse a unha nova dedución fiscal, sempre que os pagos non se realicen en efectivo. No curso actual, 166.449 alumnos beneficiáronse de libros gratuítos a través destas iniciativas, o que representa o 70% do alumnado das etapas obrigatorias.
