A Pastoral Xuvenil do arciprestazgo de Alvedro-Cerveiro impulsou a celebración dunha Vigilia Xuvenil de Pentecostés na igrexa nova de Santa Cruz (Oleiros, A Coruña). O encontro, que tivo lugar este sábado dende as 21h, concibiuse baixo o lema "un encontro pensado por mozos e para mozos", e busca reafirmar o papel activo da mocidade na Igrexa.

A convocatoria fai un chamamento á mocidade, subliñando que "non sodes o futuro, sodes o presente e a gran esperanza da Igrexa". Destaca que, nun mundo marcado pola dor e a desesperanza, fanse máis necesarios que nunca "mozos co Espírito Santo".

Este evento considérase un fito para a Unidade Pastoral (UPA) da zona, xa que permite unir as distintas parroquias nunha proposta común. Segundo os organizadores, a vixilia fomenta "o encontro fraterno e dando continuidade e unidade ao traballo cos mozos do noso entorno". Xoves de parroquias como Santa Cruz, Osedo e Mandiá, entre outras, prepararon esta cita co obxectivo de "saír ao encontro dos seus irmáns".

A organización manifestou o seu "firme compromiso de chegar aos que máis sofren, aos que se atopan afastados nas periferias xeográficas e existenciais, e a todos aqueles que hoxe non se achegan ás parroquias". Faise un chamamento á acción coa mensaxe: "A Igrexa precisavos en saída!". A iniciativa busca transformar os mozos en "valentes testemuñas capaces de cambiar a realidade" a través da autenticidade e a fe.

Para recibir "a forza do Espírito e a promesa do Pai", a vixilia contou con varios momentos especiais. O programa incluíu un concerto de música a cargo do grupo "Xente Daquí e Dacolá", un tempo de Adoración ao Santísimo, unha oración profunda e un espazo final para dialogar entre os asistentes.

Esta celebración enmárcase dentro das Vigilias Diocesanas de Oración que promoven diversas delegacións, como Pastoral Vocacional, Apostolado Seglar, Mozos, Familia, Pastoral Universitaria, Catequese, Educación e Misións. Tamén colaboran as Vicarías de Nova Evangellización e de Vida Consagrada.

A invitación final é clara: "Non te quedes de brazos cruzados. Deus chámate a ser protagonista". Anímase aos mozos a asistir, sós, con amigos ou co seu grupo parroquial, para vivir unha experiencia de Pentecostés que, segundo a organización, "pode cambialo todo".