A mostra, titulada Seoane reencontrado. Óleos 1945 - 1977, abrirá as súas portas o vindeiro 14 de maio e permanecerá accesible durante un ano. Esta iniciativa busca afondar na obra pictórica de Luis Seoane e no seu particular linguaxe artístico, continuando co labor de difusión que a Fundación leva a cabo dende 1996.

Entre as pezas expostas, 38 óleos nunca foran mostrados en sala, e o conxunto de 55 obras non se exhibía publicamente dende hai máis dunha década. O percorrido comeza cos primeiros traballos do pintor da segunda metade dos anos 40, como O ermitán (1945) ou Cabeza de campesiño (1946), caracterizados por unha paleta cromática restrinxida e unha pincelada espesa.

A medida que avanza a década, obsérvase unha evolución na perspectiva e no uso da cor, que se fai máis intensa e variada, como se aprecia en Pelando papas (1950). A exposición tamén destaca un período de case 15 anos no que Seoane desenvolve plenamente o seu estilo, marcado por grandes masas de cor e segmentos gráficos, froito da súa experiencia como muralista.

A mostra inclúe óleos de carácter máis experimental, como Cargando cun bulto ou Abstracción I (1962), que ofrecen unha lectura diferente da súa práctica artística. Tamén se abordan aspectos biográficos do artista, como o retrato de Alfredo Cáceres ou unha serie de homenaxes a estrelas do cine mudo de 1970, que regresan á sala principal de exposicións xunto con Figura en interior (1950).