A área de Turismo da Deputación da Coruña está presente na edición de 2026 da feira Intur, celebrada en Valladolid, cunha proposta centrada na promoción turística da provincia baixo o lema «A paisaxe que sabe». O obxectivo é dar a coñecer os atractivos do territorio coruñés, realzando a súa identidade, a riqueza paisaxística e a conexión entre natureza, cultura, tradición e gastronomía.
A institución provincial dispón dun stand propio onde se ofrece información turística sobre os diversos destinos e recursos da provincia. Destácase un territorio diverso cun importante patrimonio natural e cultural, produtos locais e experiencias únicas que o definen.
A programación inclúe unha demostración de cestería tradicional en directo a cargo de Caravel Ecocestos. Esta actividade achega ao público un oficio artesanal ligado aos recursos naturais e aos saberes propios do territorio, en liña coa filosofía de «A paisaxe que sabe», que promove un turismo auténtico e respectuoso cos recursos locais.
Ademais do espazo expositivo, a Deputación da Coruña participa no mercado profesional Intur Negocios, cun posto na zona B2B. Este espazo facilita o contacto directo con empresas e operadores turísticos para establecer relacións comerciais e ampliar a proxección da oferta provincial en mercados especializados.
Con esta participación, a Deputación da Coruña busca reforzar a promoción dun modelo turístico sustentable, diversificado e vinculado ao territorio, posicionando a provincia como un destino de experiencias auténticas durante todo o ano.
