A programación provincial, baixo o lema «A paisaxe que sabe», rexistrou unha elevada afluencia de público, que descubriu con sorpresa a diversidade, calidade e posibilidades culinarias dos produtos da provincia. As elaboracións dos cociñeiros e cociñeiras, as degustacións e as presentacións dos produtos locais espertaron un notable interese.
A participación no foro permitiu aos produtores locais establecer importantes contactos comerciais con profesionais da distribución e da restauración, abrindo novas oportunidades de colaboración e negocio. Esta acción de promoción facilita o acceso dos produtos locais a novos mercados e amplía as súas posibilidades de comercialización.
“"O obxectivo non era unicamente dar a coñecer os nosos produtos, senón tamén ofrecerlles aos produtores da provincia unha oportunidade real para establecer contactos, abrir mercados e xerar novas posibilidades de negocio. A resposta do público foi extraordinaria. Moitas persoas sorprenderonse ao descubrir a enorme variedade e calidade do que se produce na provincia da Coruña, así como a capacidade dos nosos profesionais para transformar eses produtos en propostas gastronómicas de primeiro nivel. Pero, sobre todo, estamos satisfeitos porque esta presenza tamén se traduciu en oportunidades comerciais para as empresas e os produtores participantes."
O vicepresidente da Deputación, Xosé Regueira, incidiu en que a promoción do produto local ten unha dimensión económica e social que vai moito máis alá da gastronomía. "Cando damos a coñecer un queixo, un viño, un marisco, unha carne ou calquera outro produto da nosa provincia, estamos tamén poñendo en valor o traballo das persoas que están detrás del, as explotacións, as confrarías, as pequenas empresas e todo un tecido produtivo que é fundamental para o noso rural". Engadiu que "apostar polo produto de proximidade significa contribuír á xeración de riqueza e oportunidades no territorio, favorecer a actividade económica, crear emprego e axudar a fixar poboación".
Ao longo das tres xornadas, o espazo da Deputación contou coa participación de empresas como A Conserveira, Bonilla a la Vista, Cárnicas Domínguez, Mariscos de Barallobre, Cafés Aruba, San Isidro Bakery, Galegas de Nata, Galmesán, Empanadas Ternura e María Manuela Enoturismo. Tamén participaron o gañador do concurso Mellor Cociñeiro Galego do Ano 2025, Víctor Basante, xunto con Naír González, Mar Lago, Álex Martínez, Andrés Torreiro, o sumiller Alejandro Paadín, Óscar Ramil, xerente do Consello Regulador da DOP Arzúa-Ulloa, e Manuel Costiña, do restaurante Retiro da Costiña, distinguido con dúas estrelas Michelin.
