O concelleiro de Educación, Formación Tecnolóxica e Innovación, Juan Ignacio Borrego, presentou hoxe na Cidade das TIC o proxecto europeo Allocate. O encontro tivo lugar ante unha delegación internacional que participa na Misión Inversa "GovTech: innovación, seguridade e cooperación", organizada polo Clúster TIC Galicia co obxectivo de dar a coñecer o ecosistema tecnolóxico galego e favorecer novas oportunidades de cooperación.
Durante a xuntanza, Borrego trasladoulles aos integrantes da delegación a visión da Coruña sobre o desenvolvemento da intelixencia artificial. Subliñou a necesidade de aproveitar as capacidades tecnolóxicas e de coñecemento existentes na cidade para xerar innovación local, mellorar os servizos públicos e crear oportunidades para o tecido empresarial.
"Esta visión conecta co compromiso municipal coa mellora continua das políticas e servizos públicos e coa xeración de oportunidades de futuro e progreso social e económico. Son obxectivos que todos e todas compartimos, e temos que atopar novas formas de conseguilos", apuntou Borrego.
Neste contexto, o concelleiro presentou Allocate como unha iniciativa que permite converter esa visión de cidade en actuacións concretas, mediante a colaboración entre administracións, universidade e empresas, e o desenvolvemento de infraestrutura, coñecemento e aplicacións de intelixencia artificial vinculadas ás necesidades urbanas.
A Misión Inversa reúne perfís relacionados coa transformación dixital das administracións, políticas de innovación e desenvolvemento de infraestruturas e servizos tecnolóxicos. A delegación inclúe representantes de organismos como a Oficina Nacional de Tecnologías de la Información de Arxentina e a Comisión Presidencial de Gobierno Abierto y Electrónico de Guatemala, ademais de Agesic e Uruguay Innova.
O proxecto europeo Allocate, cun investimento de 5,5 millóns de euros (4,4 de fondos comunitarios e 1,1 de achega municipal), busca conectar administración, universidade e empresas TIC; crear un contorno local de computación e datos para facilitar o desenvolvemento de solucións de intelixencia artificial por parte das pemes; e xerar capacidades mediante formación en IA verde e ética.
O proxecto prevé traballar con datos urbanos, infraestrutura de computación e formación especializada para impulsar solucións de intelixencia artificial aplicadas a retos de mobilidade, xestión de residuos e atención cidadá, combinando as perspectivas Green by AI, Green in AI e Ethical AI.
