A intervención céntrase na mellora da accesibilidade, o cierre perimetral, o tratamento de fachadas e a instalación de soportes para paneis interpretativos neste importante xacemento patrimonial, cuxa orixe se remonta aos inicios da cidade.
O proxecto, que conta cun investimento de case 169.000 euros, enmárcase nos esforzos municipais por potenciar os elementos arqueolóxicos e patrimoniais da cidade como parte da oferta cultural e divulgativa. A edificación, inicialmente construída extramuros, foi integrada na defensa da cidade por Felipe II.
Coas obras preténdese facilitar as visitas individuais e en grupo, compatibilizándoas coa protección e conservación do xacemento, ademais de mellorar a comprensión e interpretación dos restos arqueolóxicos por parte dos visitantes.
A actuación inclúe a prolongación do pavimento de laxas de pedra, a limpeza e acondicionamento das fachadas da Igrexa da Orde Terceira e a medianeira do Museo Militar, así como a consolidación de elementos arquitectónicos conservados da nave central da igrexa do antigo convento e do muro que une o torreón da igrexa co Museo Militar.
Tamén se substituirá o enreixado das fiestras da medianeira do Museo Militar por paneis metálicos e arranxarase a fachada para pintala dunha cor escura uniforme, mellorando a interpretación das estruturas de pedra adxacentes. Todas as intervencións seguirán criterios de reversibilidade, mínima intervención e baixo impacto paisaxístico.
