A cidade da Coruña é dende este luns o epicentro da Opening Site Visit do proxecto europeo de innovación tecnolóxica Allocate. O encontro, que se prolongará ata mañá, reúne ás cidades asociadas ao proxecto -Viana do Castelo, Heidelberg e Reggio Emilia- cos socios de execución: a UDC, o Clúster TIC, Altia e Khora Urban Consulting, ademais de representantes da Iniciativa Urbana Europea e outros participantes.
A xornada técnica, que se desenvolve na Cidade das TIC, permite ás cidades participantes coñecer en detalle o traballo realizado durante o primeiro ano de Allocate, os seus propios retos e comezar a analizar que elementos do modelo coruñés poden ser transferidos aos seus contextos urbanos. O primeiro tenente de alcaldesa e concelleiro de Economía e Planificación Estratéxica, José Manuel Lage, deu a benvida aos asistentes, destacando que "o verdadeiro valor dun proxecto europeo está na súa capacidade para xerar coñecemento" e puxo en valor o ecosistema tecnolóxico da Coruña.
O evento busca a creación de sinerxias para a xeración de novas ideas e relacións de colaboración entre cidades. A axenda combina a presentación do proxecto e dos retos das cidades participantes con demostracións, visitas técnicas e sesións de traballo sobre a transferencia. Hoxe preséntanse os avances de Allocate no seu primeiro ano, os retos das cidades socias e o deseño da infraestrutura da Comunidade de Computación Local. Tamén se destaca a formación dirixida a empresas TIC locais, cun curso de IA verde e ética que comezará o 17 de novembro. O prazo de inscrición remata o 10 de novembro na web do proxecto.
Allocate conta cun investimento de 5,5 millóns de euros, dos cales 4,4 millóns proceden do FEDER, no marco da terceira convocatoria da European Urban Initiative, mentres que os 1,1 millóns restantes son achega municipal.
Un espazo central do encontro será o Give & Take Marketplace, onde Viana do Castelo, Heidelberg e Reggio Emilia coñecerán as solucións desenvolvidas en Allocate e compartirán as súas propias experiencias. O traballo centrarase na Comunidade de Computación Local, o desenvolvemento de solucións de IA para mobilidade, atención cidadá e tratamento de residuos, e a aplicación dunha intelixencia artificial verde, ética e responsable.
A última xornada, o mércores 11 de novembro, dedicarase ao proceso de transferencia, onde os socios traballarán nunha folla de ruta cos fitos e actividades do proxecto. A Opening Site Visit sitúa así A Coruña como punto de partida dun proceso de aprendizaxe compartida, fomentando a reflexión conxunta sobre a aplicación da intelixencia artificial verde e ética aos retos urbanos.
