A Facultade de Dereito da UDC é a sede dun dos principais encontros científicos mundiais sobre valorización de residuos e biomasa, organizado polos investigadores do grupo BioEngin do CICA, Mª del Carmen Veiga e Christian Kennes. O congreso, que se inaugurou hoxe, conta con máis de 400 asistentes.
O encontro, que se prolongará ata o vindeiro venres, 10 de xullo, reúne a investigadores, profesionais da industria e estudantes para coñecer os últimos avances nun ámbito clave para a transición cara a un mundo máis sostible. Abordaranse temas como a recuperación de recursos, a produción de biocombustibles e bioprodutos, a reciclaxe e a captura de carbono.
No acto inaugural participaron Xulio Xosé Ferreiro Baamonde, decano da Facultade de Dereito; María Amalia Jácome Pumar, adxunta da Vicerreitoría de Investigación e Transferencia da Universidade da Coruña; e Juan Ignacio Borrego Vázquez, concelleiro de Educación, Formación e Innovación Tecnolóxica do Concello da Coruña, en representación da alcaldesa.
A organización corre a cargo dos investigadores do Centro Interdisciplinar de Química e Bioloxía (CICA) da Universidade da Coruña, María del Carmen Veiga e Christian Kennes, recoñecidos internacionalmente na biotecnoloxía ambiental.
Durante as catro xornadas, WasteEng2026 centrarase na conversión de biomasa e residuos en enerxía e materiais de alto valor engadido, e presentará novas solucións científicas. O programa inclúe conferencias plenarias, sesións científicas, obradoiros e presentacións de pósteres.
O congreso conta coa participación de especialistas de prestixio internacional de universidades como a Mahatma Gandhi University (India), Cornell University (Estados Unidos), McGill University ou Polytechnique Montréal (Canadá).
Ademais do seu valor científico, o encontro busca fortalecer a colaboración entre universidades, centros de investigación e empresas, impulsando a transferencia de coñecemento e o desenvolvemento de solucións innovadoras para os desafíos ambientais e enerxéticos.
A celebración deste evento reforza o posicionamento do CICA e da Universidade da Coruña como referentes en biotecnoloxía ambiental e sitúa a cidade no mapa dos grandes congresos científicos internacionais.
WasteEng celébrase cada dous anos e é un congreso de referencia mundial. Tras dez edicións internacionais, chega á Universidade da Coruña, consolidando a proxección do CICA.
O CICA, creado en 2015, é un centro de investigación de ciencias avanzadas con máis de 200 persoas investigadoras en Biomedicina, Alimentación, Contaminación e Saúde, e Nanociencia e Materiais Avanzados. Conta con apoio financeiro da UE e forma parte da rede CIGUS da Xunta de Galicia.
