O proxecto 'Camiño á Afouteza', que se enmarca na convocatoria de 2026 do programa O Teu Xacobeo, busca promover o benestar, o crecemento persoal e o empoderamento de mulleres con perfís e traxectorias diversas a través de experiencias colectivas vinculadas ao Camiño Inglés. A iniciativa, apoiada pola Xunta, articúlase en cinco etapas que buscan fortalecer vínculos e crear espazos de apoio mutuo.
A actividade celebrada en Carral, titulada “Dar: Facer pan, facer comunidade”, centrouse na tradición panadeira local. As participantes elaboraron pan en pequenos grupos, combinando o traballo colectivo coa conversa e a posta en valor dun saber tradicional. A xornada incluíu tamén unha degustación e conversa coa participación de Mari Carmen Fernández, da panadería Pedro Fernández.
Belén do Campo destacou a importancia destas iniciativas que combinan a promoción dos valores xacobeos coa igualdade, a participación social e a posta en valor dos recursos propios de cada territorio, situando as persoas no centro.
O proxecto 'Camiño á Afouteza' inclúe cinco actividades en diferentes localidades do Camiño Inglés. As primeiras celebráronse na praia de Oza (A Coruña) e na fraga de Cecebre (Cambre). As seguintes terán lugar en Mesía o 26 de outubro, cun obradoiro de artesanía dinamizado pola recoñecida artesá Idoia Cuesta, e concluirá coa etapa 'Ser activas' ata Santiago de Compostela.
A iniciativa de Gaia Inclusiva forma parte dos 55 proxectos apoiados polo programa O Teu Xacobeo, que conta cun orzamento de case un millón de euros para preto de 300 actividades en toda Galicia. Turismo de Galicia tamén abriu unha nova convocatoria para proxectos en 2027 cun orzamento de dous millóns de euros.
