A mostra, composta por máis dunha vintena de pezas, representa a comuñón do artista co mar a través do tempo e do coñecemento mutuo, articulada en tres actos que presentan o camiño percorrido polo creador.
No primeiro acto, o mar dialoga co artista, decorando o escenario con debuxos e baixorrelevos traballados sobre area mollada. No segundo, é o artista quen lle dá vida nova a elementos mariños como unha cuncha, a través da pintura, fotografía, vídeo, poesía e literatura.
O terceiro acto simboliza o regreso da cuncha, transformada polo artista, ao seu orixe mariño.
Xan Vieito, autodidacta con estudos de pintura e gravado, naceu en Vilachán de Abaixo (Negreira, A Coruña) e reside en Lourido. A súa obra está representada en institucións públicas de España, Portugal, Cuba, Arxentina, Perú e Estados Unidos, así como en coleccións privadas internacionais.
A exposición "Eu-mar" pódese visitar na sala de exposicións do Palacete das Mendoza en horario de 9:00 a 21:00 de luns a venres, e os sábados e domingos de 10:00 a 14:30 e de 16:30 a 20:00 horas ata o 15 de setembro. Posteriormente, o horario de visita será de luns a venres entre as 8:00 e as 20:00 horas, os sábados e festivos de 10:00 a 14:00 e de 16:00 a 19:00 horas, e os domingos de 10:00 a 14:00 horas.
