Durante unha visita a Entrimo, Besteiro sinalou o futuro hotel da localidade ourensá, impulsado polo Concello, como un modelo de revitalización rural sostible. Esta iniciativa, que aproveita fondos Next Generation xestionados polo Ministerio de Transportes, Movilidad y Axenda Urbana, representa, segundo o líder socialista, unha aposta polo "crecemento sostible e a dotación de servizos" fronte ao "abandono do Goberno galego".
Besteiro contrapuxo a actitude da Xunta co labor dos alcaldes e alcaldesas socialistas. "Alí onde o goberno do PP na Xunta de Galicia pecha os ollos para deixar languidecer o interior de Galicia, é onde os alcaldes e alcaldesas socialistas mostran o compromiso para fixar poboación e garantir actividade de futuro", afirmou.
Ademais do proxecto de Entrimo, o secretario xeral do PSdeG puxo en valor outras iniciativas impulsadas por gobernos municipais socialistas, como a estación de servizo de Ribeira de Piquín ou o supermercado de Pol. No caso de Entrimo, destacou a transformación do antigo casino, que foi centro neurálxico da vida social da Baixa Limia, nun albergue económico e un aloxamento hoteleiro, aproveitando a súa contorna próxima á Serra do Xurés e á ruta do Camiño Miñoto Ribeiro.
