A conselleira de Medio Ambiente e Cambio Climático, Ángeles Vázquez, e a alcaldesa de Lobios, María del Carmen Yáñez, mantiveron unha reunión en Santiago para abordar diversos temas de interese municipal, entre eles a proposta de ampliación da senda de Riocaldo.
A rexedora municipal explicou que, tras a posta en funcionamento do tramo actual, a intención do goberno local é prolongar o trazado cunha nova sección de lonxitude similar. A conselleira comprometeuse a estudar as posibles vías de financiamento para facer realidade esta futura ampliación.
“"A Xunta analizará a viabilidade da proposta do Concello de Lobios para ampliar a senda accesible de Riocaldo, a primeira da Reserva da Biosfera Gerês-Xurés que dispón dun percorrido adaptado para persoas con diversidade funcional e mobilidade reducida."
O ano pasado, a Xunta encargouse das obras de acondicionamento e sinalización do sendeiro accesible de Riocaldo. Esta intervención, que tivo en conta guías de deseño de accesibilidade en vías verdes e parques naturais, supuxo un investimento superior aos 116.800 euros. O proxecto foi cofinanciado con fondos europeos a través do Plan de Recuperación, Transformación e Resiliencia–NextGenerationEU.
Os traballos realizados incluíron a adecuación dos pavimentos, a adaptación das pasarelas, a eliminación de barreiras arquitectónicas e a instalación de zócalos, guías e varandas nas rampas existentes. Ademais, colocáronse mesas, bancos e apoios adaptados ao longo dos 1.250 metros do tramo, facilitando así o seu uso por persoas con diversidade funcional.
