O proxecto de Biometano Galicia prevé a construción dunha planta de valorización de residuos orgánicos procedentes de actividades gandeiras no concello de Mazaricos, na provincia da Coruña. O obxectivo é producir gas renovable, concretamente biometano, a partir de materiais como o xurro de vaca, o esterco e outros residuos do sector primario.
A iniciativa utilizará a dixestión anaerobia para transformar estes residuos nun biogás que, posteriormente, será convertido en biometano. Este gas renovable será incorporado á rede de gas actual, combinando así a xestión de residuos orgánicos coa xeración de enerxía limpa no rural galego.
A resolución da Xunta, publicada no Diario Oficial de Galicia, outorga o informe de impacto ambiental favorable, xa que, cumprindo as condicións establecidas, non se prevén efectos adversos significativos sobre o medio ambiente. Por este motivo, non se considerou necesaria unha avaliación de impacto ambiental ordinaria.
