A proposta, froito de 11 comisións sectoriais e máis de 1.300 achegas cidadáns, aborda o uso do galego en diversos ámbitos clave. Na educación, abrese a porta a negociar o seu uso sempre que se respecte o equilibrio lingüístico e proponse recuperar os nomes dos equipos de normalización nos centros, ademais de incentivar o seu uso na universidade e actividades extraescolares.
No ámbito da sanidade, unha das medidas destacadas é a creación dun Servizo de Normalización Lingüística propio dentro do Sergas e un xestor lingüístico en cada área sanitaria. Tamén se porá en marcha o programa 'Consulta en galego' para informar sobre profesionais que atenden neste idioma e crearase o selo “centro sanitario lingüísticamente responsable” na sanidade privada.
En canto á administración, a Xunta comprométese a fomentar o uso da lingua en todas as súas instancias, incluíndo servizos e contratos con financiamento autonómico. Estudiarase a posibilidade de levar a cabo todo o proceso xudicial en galego a través da aplicación Atenea.
No sector da economía, contemplaranse incentivos para empresas que empreguen o galego na súa comunicación, recoñecéndoo cun selo de garantía lingüística. Tamén se creará un directorio público destas compañías e o compromiso lingüístico poderá ser un mérito en subvencións e créditos públicos.
No deporte, proponse un acordo cos grandes clubs para incorporar a lingua galega nas súas comunicacións e respectar a toponimia, ademais de ofrecer asesoramento lingüístico para eventos deportivos.
En tecnoloxía, priorizarase o apoio a proxectos dixitais en galego e a creación dun portal de visibilidade. Tamén se prevén axudas para o desenvolvemento de ferramentas de Intelixencia Artificial en galego e a creación dun DataHub galego.
Finalmente, en transmisión patrimonial, proponse crear observatorios familiares e xuvenís da lingua para monitorizar a transmisión xeracional e desenvolver series de ficción xuvenil na TVG, así como unha app de ocio en galego.
