O encontro, titulado Escoitando comunidades que se coidan, foi organizado polo Grupo de Estudos en Traballo Social, Investigación e Transferencia (Gets-it) da Universidade de Vigo e o GI-Esculca da Universidade de Santiago de Compostela, co apoio da Vicerreitoría de Estudantes e Vida Universitaria da UVigo. A coordinación correu a cargo de Iria Vázquez (UVigo), Cristina Varela e David García (USC).
Na apertura, Iria Vázquez subliñou a importancia de "rachar estereotipos e prexuízos sobre o rural" dende a universidade. David García destacou a necesidade de abandonar o modelo urbanocéntrico e ver a realidade rural con iniciativas como estes encontros. Isabel Mociño, decana da Facultade, recalcou o compromiso do centro coa contorna e o pensamento crítico, mentres que Raquel Rial, directora de área do campus de Ourense, salientou o papel da institución académica na posta en valor do medio rural.
A Comunidade de Accións e Saberes Arredor do Rural traballa dende 2021 para crear sinerxías entre a universidade e os territorios rurais, abordando as dificultades de conexión do estudantado co medio e promovendo futuros laborais sostibles e xustos. O obxectivo é aproveitar os recursos de ambas partes para unha aprendizaxe mutua e achegar valor social conxuntamente.
A programación incluíu unha mesa redonda-podcast sobre as necesidades ecosociais do medio rural, moderada por Iria Vázquez e coa participación de Cooperativa Outonía e CDR O Viso. Tamén se realizou un obradoiro sobre metodoloxías de colaboración, onde se presentaron iniciativas de GI-Esculca e Amigas da Terra, como os fondos de coñecemento do campesiñado, proxectos de aprendizaxe-servizo e a rede de ecohortas escolares.
