A iniciativa municipal combinou orientación laboral, formación, prácticas en empresas e intermediación para facilitar a entrada no mercado laboral. O balance final rexistrou 93 ofertas de emprego tramitadas e 31 persoas que realizaron prácticas non laborais en 11 empresas colaboradoras.
A alcaldesa de Mos, Nidia Arévalo, subliñou que os resultados reflicten o esforzo realizado e a importancia dun acompañamento próximo ás persoas que buscan oportunidades. "Detrás destes datos hai persoas que fixeron un esforzo importante para formarse, mellorar as súas capacidades e acceder a un emprego", sinalou, destacando o papel do programa en conectar demandantes con empresas.
Arévalo tamén puxo en valor os bos resultados obtidos entre os maiores de 50 anos e as persoas con discapacidade, colectivos que tamén viron facilitada a súa inserción laboral grazas ao programa.
“"Para os concellos é importante contar con este apoio, porque nos permite desenvolver programas próximos ás persoas e responder ás necesidades reais do mercado laboral."
O acto de clausura incluíu un coloquio coas empresas participantes e o recoñecemento ao esforzo dos asistentes e á implicación das entidades de formación: Recursos Galicia, Formalar, Global Taining, Lusant Formación e Folerpa.
O Concello agradeceu tamén a colaboración de empresas como Alcampo, Cogami, FCC Medio Ambiente, Eulen, entre outras, que ofreceron prácticas, realizaron contratacións ou detectaron oportunidades de emprego.
En canto á formación, realizáronse 31 accións colectivas (592 horas), 12 do catálogo do SEPE (380 horas) e outras 19 (212 horas), centradas en ámbitos como limpeza, TIC, loxística, hostalaría e servizos á comunidade, perfís demandados polas empresas.
Arévalo tamén agradeceu o traballo das técnicas Andrea López (orientación laboral) e Victoria Lago (educadora social), así como o apoio institucional da Xunta de Galicia, fundamental para o desenvolvemento do programa e o contacto directo co tecido empresarial.
