A Consellería de Educación, Ciencia, Universidades e FP achega 12,3 M€ para 102 investigadores na etapa inicial da carreira investigadora, que desenvolverán o seu labor durante catro anos. Para investigadores posdoutorais, o Goberno galego destina 18,4 M€ en dúas convocatorias que suman 70 axudas para realizar o seu traballo por períodos de seis e tres anos.
Do total de científicos, 151 incorpóranse ao sistema e 21 continuarán o seu traballo en centros de investigación e organismos galegos tres anos máis. Por destino, 150 farán o seu labor nas tres universidades galegas: 99 na Universidade de Santiago (USC), 33 na Universidade de Vigo (UVigo) e 18 na Universidade da Coruña (UDC). Outros 22 investigadores desenvolverán os seus proxectos noutras entidades.
Na etapa predoutoral, 102 investigadores beneficiados incorporaranse ao inicio de curso nas tres universidades galegas (90) e 12 a outras entidades como o Centro de Supercomputación de Galicia (CESGA), organismos de investigación sanitaria e biomédica ou centros do Consello Superior de Investigacións Científicas (CSIC) en Galicia. As axudas son ata o ano 2030.
En canto ás axudas posdoutorais, 49 son para investigadores por un período de seis anos nas universidades galegas (40) e noutras entidades (9). A Xunta destina máis de 15,1 M€ ata o ano 2032. Dos 40 que se incorporarán ás universidades galegas, 23 irán á USC, 15 á UVigo e 2 á UDC.
Outros 21 investigadores posdoutorais, aos que a Consellería destina 3,3 M€, continuarán a súa etapa por tres anos máis, ata 2029. Neste caso, 20 investigadores desenvolven a súa carreira nas tres universidades galegas (12 na USC, 6 na UVigo e 2 na UDC) e un no Instituto de Investigación Sanitaria de Santiago.
Os contratos predoutorais teñen catro anos de duración e inclúen estadías no estranxeiro, cun importe máximo anual que varía entre 24.600 € e 30.600 €, podendo chegar a 31.500 € para a orientación posdoutoral.
As axudas posdoutorais, cunha primeira fase de mellora de capacidades mediante estadías no estranxeiro, contemplan unha bolsa de 32.800 €/ano durante os primeiros tres anos. Na segunda fase, os beneficiarios cobrarán 50.900 € ao ano para perfeccionar a súa formación e establecer unha liña de investigación propia.
Estas actuacións forman parte da aposta da Xunta pola ciencia, reflectida no Plan galego de investigación e innovación 2025-2027, dotado con 1.310 M€, e son un dos piares para a contratación de persoal científico universitario.
