A Asociación Cultural Interfolc, en colaboración co Concello de Vigo, organizou unha gran festa para conmemorar o Día da Muiñeira. Baixo un sol radiante, preto dun milleiro de persoas, entre bailaríns e músicos, participaron neste evento que tivo lugar na céntrica rúa Venezuela.

Un total de 858 participantes, pertencentes a 47 grupos de 30 entidades diferentes de Vigo e a súa área metropolitana, despregaron a súa arte e paixón pola música tradicional galega. A rúa Venezuela transformouse nun vibrante escenario onde a muiñeira foi a protagonista indiscutible dende as 12:00 horas.

O público, que se congregou nas beirarrúas, puido gozar dunha xornada festiva na que a música e a danza tradicional galega foron as estrelas, convertendo a celebración nun éxito de participación e ambiente.