A Universidade de Vigo e a Autoridade Portuaria de Vigo (APV) confirmaron a súa estreita colaboración institucional co obxectivo de converter Vigo nun referente en sostibilidade, innovación tecnolóxica e economía azul. A reitora, Carmen García Mateo, e o presidente da APV, Carlos Botana, reuníronse para repasar as iniciativas conxuntas e planificar futuras accións en investigación, capacitación de talento e desenvolvemento socioeconómico.
Un dos puntos clave abordados foi a posta en marcha dun estudo sobre o impacto socioeconómico do Porto de Vigo e a súa área de influencia, centrado nos sectores da pesca, froita e conserva. Este análise, encargado a un equipo universitario dirixido polo profesor Carlos Rodríguez, avaliará o emprego, o valor engadido e a dinamización comercial.
Tamén se tratou o reforzo da presenza de representantes da universidade nos órganos de traballo portuarios, como os grupos Blue Growth ou o Consello de Navegación, co fin de mellorar o transvase de coñecemento entre a academia e a xestión portuaria.
Ambas entidades xa colaboraron con éxito en proxectos como PuertAlMar, MarENet, BlueFishing Training, SARIL, NaturPorts ou ImpulsaAzul. Agora, inician unha nova etapa de cooperación estratéxica en innovación, investigación aplicada, formación e desenvolvemento de solucións para o ámbito mariño e a economía azul, incluíndo a difusión e innovación oceánica a través do Campus do Mar.
Entre as novas propostas de investigación inclúense proxectos sobre o tratamento de vertidos mediante Solucións baseadas na Natureza (SbN), a medición do ruído submarino e a avaliación integrada de contaminantes.
Ademais, ratificouse a sinatura dun novo convenio para reforzar as prácticas do alumnado e investigadores no Porto de Vigo, buscando sinerxías entre o ámbito empresarial e a formación universitaria para adecuar os perfís profesionais ás necesidades do sector.
Carlos Botana e Carmen García Mateo coincidiron en destacar que a suma de sinerxías entre Porto e Universidade é a vía máis eficaz para transformar o coñecemento científico en valor ambiental, económico e social para Vigo e a súa contorna.
