A Universidade de Vigo puxo en marcha unha nova edición dos Premios Egeria co obxectivo de recoñecer, visibilizar e fomentar a inclusión da perspectiva de xénero e dos estudos feministas nos traballos de fin de estudos de grao (TFG), mestrado universitario (TFM) e teses de doutoramento presentados durante o curso académico 2025/2026. Estes galardóns pretenden premiar o rigor metodolóxico e a orixinalidade dos proxectos que contribúan a eliminar as fendas de xénero e a achegar unha visión crítica en calquera área do coñecemento.
A convocatoria está dividida en tres categorías con distintas dotacións económicas. Para os traballos de fin de grao, haberá un premio de 500 euros por cada grupo de áreas de coñecemento: Ciencias Sociais e Xurídicas; Ciencias, Ciencias da Saúde e Enxeñaría/Arquitectura; e Artes e Humanidades. No caso dos traballos de fin de mestrado, outorgarase tamén un premio de 600 euros por cada un destes tres grupos. Finalmente, para as teses de doutoramento, concederanse dous premios de 1000 euros cada un, independentemente da rama de coñecemento.
O xurado avaliará a calidade xeral do traballo, a relevancia do tema, a aplicabilidade dos resultados, o uso de linguaxe inclusiva, a calidade das referencias bibliográficas e a redacción en lingua galega. Para poder optar aos premios, os TFG e TFM deben ter obtido unha cualificación mínima de 9 puntos, mentres que as teses de doutoramento requirirán unha defensa cunha cualificación de sobresaínte cum laude entre o 1 de outubro de 2025 e o 30 de setembro de 2026.
As solicitudes presentaranse de forma telemática a través do formulario habilitado na Secretaría Virtual da UVigo. O prazo para a presentación de candidaturas xa está aberto e finalizará o vindeiro 8 de outubro ás 23:59 horas. A comisión de avaliación estará presidida por Elena Alonso Prieto, profesora do Departamento de Enxeñaría dos Recursos Naturais e Medio Ambiente, e contará como vogais con María Platas Alonso (Departamento de Filoloxía Inglesa, Francesa e Alemá) e Francisco Javier Aguiar Fernández (Departamento de Análise e Intervención psicosocioeducativa).
