O Museo Colexiata de Sar (MuSar) está a desenvolver un proxecto para estudar e catalogar as súas pezas de orixe medieval, procedentes do antigo priorado. O equipo da UVigo, da Facultade de Historia do campus de Ourense, está a examinar esculturas, lápidas e inscricións de antigos enterramentos, así como documentos históricos depositados no Arquivo Diocesano.
O proxecto, financiado pola Consellería de Cultura da Xunta de Galicia e enmarcado nun contrato de I+D entre o Arcebispado de Santiago e a UVigo, conta coa participación dos profesores Victoriano Nodar, Francisco Javier Pérez Rodríguez e Alejandro Campos, ademais do experto epigrafista Álvaro Castresana López.
Os investigadores están a analizar a escultura románica e gótica, lápidas e inscricións, algunhas datadas no século IX, que achegan novos datos sobre a importancia histórica de Santa María de Sar. O traballo tamén inclúe o escaneado e a nova catalogación de documentos medievais.
Esta iniciativa forma parte dun plan maior de renovación do proxecto museístico do MuSar e inclúe visitas guiadas e encontros didácticos para escolares co obxectivo de divulgar a riqueza do conxunto monumental.
