A mostra, que ten carácter itinerante, reúne 35 ilustracións orixinais creadas por artistas galegos e galegas. Estas obras buscan interpretar os textos da recoñecida autora desde linguaxes plásticas contemporáneas, poñendo de manifesto a vixencia da figura de Rosalía de Castro.
Impulsada pola Fundación Rosalía de Castro, esta iniciativa subliña como a influencia da escritora transcendeu a literatura para converterse nun símbolo cultural de Galicia, inspirando tamén outras disciplinas como a música e as artes visuais.
“"A cultura constrúese colectivamente, e actos como o de hoxe demostran que cando sumamos esforzos, o resultado é máis rico."
Durante o acto de inauguración, o presidente da Fundación Rosalía, xunto co conselleiro de Cultura e o presidente do Parlamento de Galicia, destacaron a capacidade de Rosalía para inspirar en case todas as disciplinas artísticas, incluíndo a música e a plástica, onde deixou unha fonda pegada.
A exposición poderá visitarse na sede provincial, situada no Casco Vello de Vigo, na rúa Chao, ata o 12 de xuño, en horario ininterrompido de 9:00 a 20:30 horas.
