A xornada festiva arrancará ás 16:30 horas coa tradicional ruada dos grupos participantes, que percorrerán as rúas céntricas do municipio. A continuación, ás 17:00 horas, o Auditorio Municipal Reveriano Soutullo acollerá o concurso, onde os mellores cuartetos tradicionais da comunidade medirán o seu talento.
O certame conta cun orzamento de 10.000 euros destinados a galardóns e axudas. O primeiro premio está dotado con 2.000 euros e unha gaita tradicional galega de artesanía. O segundo clasificado recibirá 1.600 euros e un tamboril, mentres que o terceiro e cuarto posto obterán 1.200 e 800 euros, respectivamente. Ademais, cada un dos cuartetos non premiados recibirá unha gratificación de 600 euros.
Esta edición renderá unha homenaxe a Wenceslao Cabezas "Polo", recoñecido pola súa contribución á música e baile tradicional galego. O concelleiro de Cultura, Juan Carlos González, destacou a calidade artística do evento e o compromiso do Concello co coñecemento dos músicos e a traxectoria de quen mantén viva a cultura galega.
A alcaldesa de Ponteareas, Nava Castro, sinalou a relevancia de manter vivo este legado, cualificando o concurso como "o orgullo cultural da nosa vila e o máis antigo da nosa terra". Destacou a honra de homenaxear a "Polo", cuxo compromiso deixou unha pegada imborrable en xeracións de músicos galegos.
Tras a entrega de premios e o acto de homenaxe, a celebración continuará ás 21:00 horas no Parque da Feira Vella co concerto gratuíto da mítica formación folk galega "A Roda", que porá o broche de ouro á xornada.
Dende o Concello convídase a toda a veciñanza e visitantes a sumarse a esta xornada de orgullo, tradición e memoria cultural. A entrada a todas as actividades será gratuíta ata completar aforo.
