A alcaldesa de Redondela, Digna Rivas, anunciou a través das redes sociais do Concello que o carismático Miguel Ángel Revilla, expresidente de Cantabria, será o pregoeiro da Festa do Choco. O evento principal terá lugar o 10 de abril, e a véspera, Revilla protagonizará un coloquio no Auditorio da Xunqueira.
Rivas desprazouse ata Santander para reunirse co político e facer público o seu compromiso coa festa. A rexedora destacou que a presenza de Revilla representa un “impulso excepcional para a proxección exterior” da celebración, que este ano alcanza a súa trixésimo novena edición, e para o produto estrela que enxalza, o choco.
“"Non só é un gran embaixador da gastronomía e dos produtos do mar, senón que a súa presenza axudará a que a Festa do Choco teña unha repercusión nacional sen precedentes."
A alcaldesa subliñou o “carisma e a capacidade de comunicación” de Miguel Ángel Revilla, agradecéndolle que aceptase a invitación. Inicialmente, Revilla amosouse reticente debido á complexidade da viaxe, que implicaría seis horas en coche ou unha combinación de voos desde Santander a Madrid e despois a Vigo, para finalmente chegar a Redondela. “Eu xa teño 83 anos e non estou para eses trotes”, recoñeceu.
Non obstante, a insistencia de Rivas, quen o visitou en Santander acompañada dunha concelleira e o seu marido, acabou por convencelo. Revilla confesou ser pescador de chocos, aínda que na súa terra os coñecen como “cachón”.
