A localidade de Redondela acollerá o vindeiro sábado 22 de agosto a tradicional Gala Drag, enmarcada na 27ª edición do Entroido de Verán. O evento, que se celebrará no recinto do campo da feira ás 21:30 horas, busca ser unha gran festa do respecto e a liberdade, repartindo un total de 2.000 euros en premios.
O presentador e showman Carlos Veleiro será o mestre de cerimonias desta gala, que tamén contará coa actuación da artista convidada Carolina Smith. O xurado valorará a orixinalidade, creatividade e elaboración das fantasías presentadas polos participantes.
A concelleira de Cultura e Turismo, Rita Pérez Táboas, destacou que a Gala Drag é unha parte fundamental do Entroido de Verán, non só como espectáculo e diversión, senón tamén como un compromiso coa igualdade e a diversidade. Segundo Pérez Táboas, o evento é "o mellor reflexo do noso orgullo e da nosa aposta firme pola inclusión", subliñando a colaboración coa concellaría de Igualdade para usar a cultura e a festa como ferramentas de visibilización e de derrubo de barreiras sociais.
As actividades no recinto comezarán xa ás 20:00 horas coas sesións dos DJs Sara Gonzálezz e Borja Rúa. Tras a Gala Drag, a música continuará cun concerto dos galegos Monoulious DOP (de 23:00 a 0:30 horas) e a actuación internacional do grupo arxentino Ráfaga (de 0:30 a 2:15 horas). A xornada pecharase coa sesión dos DJs Kike Varela e Rodri Vegas ata as 4:00 horas.
