Un total de 7.700 euros repartíronse entre os gañadores e gañadoras dos certames de creación artística da UVigo, nos que puideron participar todos os colectivos que forman parte da comunidade universitaria.
Na XXIII edición do certame de maquetas de música, o primeiro premio foi para Nunca para ti maus abertas, do grupo As Pegas (Eider Carballeira Domínguez, Duarte Lima Temprano, Nerea Grobas Barciela e Marcos Tubío Campos), dotado con 850 euros. O segundo premio, de 450 euros, foi para Nada para Marte do grupo Corpo Un.
Os XXIII premios de pintura recoñeceron a obra El jardín después del jardín, de Jimena Arenas Costas, con 1000 euros. O segundo premio, de 600 euros, foi para Sumergirse en el tronco de un árbol, de Goa Vázquez Pichel.
No XXII certame de fotografía, na modalidade de serie, o galardón recaeu en Camuflaje, de Julieta Romano (600 euros), mentres que o segundo premio foi para Se a montaña poidese falar, de Alba Amoedo Cal (300 euros). En fotografía única, Furia na néboa, de Emma Poceiro Neira, gañou con 400 euros, e Retrato do xardín de castro Sampedro, de Marzo Lozano Ramírez, obtivo o segundo premio (200 euros).
Na XXIII edición do Premio de Creación audiovisual, dúas das tres modalidades quedaron desertas. En curta narrativa, o segundo premio foi para Faisca, de Marta Rodríguez Quintana (400 euros). En non ficción, outorgáronse dous accésits de 400 euros cada un a Polbeiros, de Ángel Cea Otero, e a Tres sonos desperta, de Alba Amoedo Cal. En vídeo experimental, o primeiro premio foi para A pel do río, de Alba Amoedo Cal (700 euros), e concedeuse un accésit a Baixo os párpados, de Laura Paz Iglesias (400 euros).




