A vicepresidenta da Deputación de Pontevedra, Luisa Sánchez, remitiu este venres unha carta ás tres administracións co obxectivo de "comezar a urxente recuperación que o aeroporto de Vigo necesita". A proposta busca a unión das administracións implicadas a nivel estatal, autonómico, provincial e local.
Na misiva, dirixida ao Director de Datos e Mercado Aeronáutico de AENA, Ignacio Biosca, o Conselleiro de Presidencia, Xustiza e Deportes, Diego Calvo, e o alcalde de Vigo, Abel Caballero, a vicepresidenta provincial lembrou a vontade de colaborar activamente para acadar a maior operatividade posible do aeroporto.
Luisa Sánchez sinalou que o goberno provincial puido analizar os casos de negocio estudados por Aena, considerándoos un "excepcional punto de partida" para reverter a actual conectividade de Peinador. Subliñou a necesidade de "novas vías de potenciación" ante o "fracaso evidente" dunha política aeroportuaria descoordinada, destacando a importancia estratéxica do aeroporto para o turismo, a empresa e a poboación da provincia.
Tomando como referencia o modelo exposto por Aena e no que xa participa a Xunta de Galicia, a Deputación anunciou un investimento de 200.000€ por cada nova ruta que se estableza en Peinador. O "Pacto por Peinador" busca afondar na colaboración mutua e propón unha reunión de traballo para concretar aspectos e conseguir a potenciación do aeroporto de Vigo.
