A Escola Superior de Enxeñaría Informática do campus de Ourense será este sábado, 7 de novembro, punto de encontro dos amantes da tecnoloxía coa celebración do DevFest 2026. A xornada preséntase como “a gran festa da tecnoloxía Galicia” e está organizada polo Google Developer Group (GDG) de Ourense co apoio da Escola Superior de Enxeñaría Informática da UVigo e o patrocinio de diversas entidades. O evento forma parte de DevFest, unha rede global de conferencias tecnolóxicas impulsadas pola comunidade.
Nesta edición, o DevFest consolídase como "o punto de encontro de referencia para os apaixonados da tecnoloxía no noroeste peninsular”. A programación, que se estenderá desde as 9.00 h ata as 20.30 h no edificio Politécnico, centrarase na intelixencia artificial e os axentes autónomos, indo “máis aló dos LLMs tradicionais”, así como no desenvolvemento web e móbil, cloud computing, green tech e tecnoloxías emerxentes como a computación cuántica e a bioinformática.
O evento contará con relatorios de conferenciantes estatais e internacionais, talleres prácticos en formato codelabs e dinámicas de traballo en rede. Entre os relatores figuran Susanna Wong (Google Developer Expert), Davide Passafaro (Google Developer Expert en Angular), Roushanak R (IBM), Alejandro de la Cruz López (Astrafy) e Eric Risco de la Torre (Andorra Telecom). As charlas abordarán desde a enxeñaría de software con axentes ata a execución de modelos de intelixencia artificial no navegador. A xornada incluirá demostracións de start-ups como Sizit, Trenio e Docucraft, e rematará cunha mesa redonda sobre o sentido de aprender a programar.
Manuel Alonso, responsable do GDG Ourense e profesor da Escola Superior de Enxeñaría Informática, sinala que o DevFest busca traer a Ourense referentes tecnolóxicos e demostrar o talento local. A entrada ten un custe de 5 euros e pode mercarse na web da iniciativa. O GDG Ourense, un grupo de apaixonados pola tecnoloxía, organiza ao longo do ano charlas e xornadas abertas para conectar profesionais e entusiastas do sector.
