O ciclo Orballo Cultural, impulsado no marco de Concertos do Xacobeo, chega este verán a Baiona e A Guarda. A iniciativa busca ofrecer unha experiencia cultural única combinando música en directo, gastronomía autóctona e artesanía local en espazos de especial valor patrimonial e paisaxístico.
A Guarda acollerá a súa cita o vindeiro 24 de xullo no Estadio do Tecla, coas actuacións de Luar na Lubre e Balteira. Pola súa banda, Baiona será escenario o 21 de agosto na Praza da Palma, con concertos de Baiuca e Maricarme.
O comisario do Xacobeo, Marcos Gómez Román, destacou durante a presentación que este formato reducido busca reforzar o atractivo turístico e cultural das vilas galegas, ofrecendo experiencias máis próximas e singulares que conectan coa identidade de cada territorio.
Nesta edición, Orballo Cultural reunirá a 18 artistas do panorama musical galego, incluíndo nomes como Budiño, Fillas de Cassandra ou Xabier Díaz. Ademais da música, cada encontro servirá de escaparate para a riqueza gastronómica e artesanal dos municipios anfitrións, fomentando a colaboración con produtores e negocios locais para a reactivación económica.
A iniciativa forma parte da programación de Concertos do Xacobeo 2026, que busca converter Galicia nun mapa sonoro durante todo o ano, combinando grandes citas internacionais con propostas de proximidade como Orballo Cultural, consolidándose como motor cultural, económico e turístico da comunidade.
