A actuación estenderase ao longo de 1,6 quilómetros, dende o parque Alcalde Ordóñez ata o acceso a Cans, e suporá un antes e un despois na configuración do centro urbano. Esta iniciativa, que conta con financiamento do programa REACPON da Deputación de Pontevedra, implica un investimento superior ao millón de euros e busca fomentar unha mobilidade máis sostible, dando prioridade ao peón e ao uso da bicicleta fronte ao tráfico rodado.
Un dos eixes centrais da intervención é a creación dun carril bici integrado, deseñado segundo as recomendacións da Xunta de Galicia e do Ministerio de Transportes. Este novo eixo ciclista concíbese como o primeiro dunha rede máis ampla que conectará o centro urbano coas parroquias do municipio. O alcalde, Alejandro Lorenzo, presentou a iniciativa pedaleando xunto a varios mozos.
Ademais, o proxecto inclúe a ampliación de beirarrúas, a reorganización do espazo público e a mellora da seguridade viaria nunha contorna especialmente sensible. Na área de actuación concéntranse varios centros educativos e equipamentos deportivos, como institutos, colexios, o pavillón municipal e a piscina, o que xera un elevado volume de desprazamentos diarios de poboación infantil e xuvenil. Neste contexto, tamén está prevista a construción dunha rotonda de acceso nas inmediacións do IES Pino Manso, co obxectivo de mellorar a circulación e reducir riscos.
A humanización non se limitará á mobilidade, senón que contempla unha reforma integral do viario. Isto inclúe novo asfaltado e sinalización horizontal, instalación de sinalización vertical, soterramento da rede de iluminación, incorporación de luminarias LED e novas columnas, mellora do sistema de drenaxe e renovación da rede de abastecemento. A todo isto súmase a plantación de arborado, co fin de xerar unha contorna urbana máis amable, mellorar a calidade ambiental e reforzar a integración paisaxística do espazo.
A actuación tamén terá en conta a conexión con puntos estratéxicos do municipio, como a estación ferroviaria, os aparcadoiros disuasorios e os principais focos de mobilidade diaria. A medio prazo, o Concello prevé prolongar o carril bici por outras rúas como Fernández Areal e Domingo Bueno, consolidando unha rede que favoreza os desprazamentos sostibles en todo o termo municipal. En paralelo, o Goberno local traballa noutras medidas complementarias, como a futura instalación dun punto de recarga para bicicletas eléctricas no aparcadoiro público da Avenida de Galicia, e a revisión das condicións deste aparcadoiro para adaptalo ás necesidades actuais.
O Concello prevé aprobar de forma inmediata a partida municipal necesaria para cofinanciar o proxecto. A licitación podería activarse nun prazo aproximado de dous meses, o que permitirá avanzar cara ao inicio efectivo das obras. Cunha superficie de actuación próxima aos 23.000 metros cadrados, a intervención aspira a transformar non só unha rúa, senón o modelo de mobilidade de O Porriño, apostando por un espazo máis accesible, seguro e adaptado ás necesidades actuais.
