A Comunidade Autónoma sitúase á vangarda grazas a fitos como a nova Estratexia de Biotecnoloxía de Galicia 2026-2030, a liña de comunicacións cuánticas entre Santiago e Vigo ampliada a Portugal, o novo Centro de Supercomputación de Galicia (Cesga) ou a factoría europea de IA 1HealthAI.
A directora da Axencia Galega de Innovación, Carmen Cotelo, participou na Mesa redonda institucional autonómica: la investigación en el territorio, dentro do curso 'Políticas públicas para la ciencia y retos científicos'. Cotelo explicou que o alto grao de conexión entre empresas, universidades e centros tecnolóxicos en Galicia é froito dunha longa traxectoria de impulso á colaboración.
Na mesa tamén interviron o conselleiro de Ciencia, Empresas, Formación e Emprego do Principado de Asturias e a directora xeral de Investigación e Innovación Tecnolóxica na Comunidade Autónoma de Madrid. Púxose en valor a colaboración entre os axentes do ecosistema de I+D+i e a aposta galega pola tecnoloxía cuántica ou a biotecnoloxía, sen descoidar o apoio a sectores tradicionais.
Cotelo informou que a aposta por tecnoloxías avanzadas como a cuántica, a IA ou a biotecnoloxía fundaméntase no seu potencial para unha transformación profunda, impacto económico relevante e avance da I+D+i. Esta aposta convive co apoio á modernización de sectores tradicionais a través da innovación, en liña cos retos da Estratexia de especialización intelixente de Galicia.
Instrumentos como Nexos ou Unidades Mixtas de Investigación, Oportunius e Ignicia son claves para relacionar estas prioridades, segundo destacou a directora.
Finalmente, a directora da Axencia subliñou o papel decisivo do Consejo Superior de Investigaciones Científicas (CSIC) como aliado estratéxico da Xunta en proxectos como o novo Cesga ou a instalación da factoría europea de IA 1HealthAI en Galicia.
