A Universidade de Vigo reforza a súa aposta pola difusión da investigación lingüística coa colección Lingua, unha iniciativa impulsada polo Instituto de Investigación Lingua (iLingua), en colaboración co Servizo de Publicacións. A colección nace coa vontade de dar visibilidade a traballos especializados sobre a linguaxe e as linguas, especialmente aqueles relacionados coas liñas temáticas do instituto, e ofrecer un espazo editorial tanto para novas perspectivas como para a revisión e actualización de achegas clásicas.
Este xoves presentouse no salón de graos da Facultade de Filoloxía e Tradución o primeiro libro desta nova colección, Glotosemiótica. Integración del signo lingüístico de F. de Saussure en la semiótica de Ch. S. Peirce. No acto, o autor, Juan Carlos Moreno Cabrera, catedrático xubilado da Universidade Autónoma de Madrid, estivo acompañado polo director do Servizo de Publicacións, David Tizón; o director e a secretaria do instituto Lingua, Javier Pérez Guerra e María del Carmen Méndez, e a delegada de Publicacións do iLingua, Mª del Carmen Cabeza.
Este primeiro libro, de máis de 500 páxinas, aborda o diálogo entre a semioloxía de Ferdinand de Saussure e a semiótica de Charles S. Peirce, integrando o signo lingüístico saussureano no marco teórico de Peirce para reflexionar sobre os fundamentos da significación.
María del Carmen Cabeza explicou que a serie busca dar difusión ás investigacións lingüísticas, explorando novas perspectivas e revisando achegas clásicas. Sinalou que o primeiro volume, Glotosemiótica, representa un feliz encontro na encrucillada da natureza dos símbolos e a construción da linguaxe. Destacou tamén a amplitude do traballo de Moreno Cabrera, que integra linguas de signos e escritura nunha proposta semiótica ampla, froito da súa "ousadía, talento e profundidade analítica".
Pola súa banda, David Tizón, director do Servizo de Publicacións, cualificou a colección Lingua como un referente pola súa vocación de excelencia editorial, cun comité científico propio e asesoramento externo. Sinalou que ten capacidade para captar obras de gran relevancia e aspira a selos de calidade editorial como o CEA-APQ, o que a convertería na primeira colección da UVigo en conseguilo.
A presentación da nova colección estivo acompañada dunha conferencia do profesor Moreno Cabrera, titulada Una incursión de ida y vuelta en zigzag, sobre os aspectos icónicos dos ideófonos a partir da análise da palabra ‘zigzag’.
