O proxecto céntrase en comprender como os ácidos graxos de cadea curta, producidos pola microbiota intestinal, inflúen no apetito dos peixes e na súa utilización do alimento. Estes compostos, como o butirato, o acetato ou o propionato, son clave na regulación da inxesta.
Cristina Velasco explica que a eficiencia alimentaria depende non só da cantidade e calidade do alimento, senón tamén dos sinais que regulan a inxesta, implicando necesidades enerxéticas e a palatabilidade. O proxecto busca entender a participación destes ácidos graxos e o seu uso na formulación de pensos acuícolas máis eficaces.
A investigación utiliza a troita arco da vella como modelo e combina estudos fundamentais e aplicados. Estrutúrase en tres obxectivos: analizar in vitro o papel destes compostos na alimentación; estudar a súa acción no eixo intestino-cerebro e a súa influencia nos centros cerebrais do apetito; e avaliar a eficacia de pensos con baixos niveis de fariña de peixe enriquecidos con compostos prometedores.
Este traballo sentará as bases para o desenvolvemento de novos pensos acuícolas máis sostibles, mellorando a eficiencia alimentaria, o benestar animal e a produtividade do sector, ademais de contribuír ao coñecemento dos mecanismos biolóxicos da alimentación dos peixes cara a unha acuicultura máis respectuosa co medio ambiente.
