O primeiro tramo das rampas mecánicas que se están a construír na rúa Serafín Avendaño ata o Halo xa está instalado. O alcalde de Vigo, Abel Caballero, visitou o luns a montaxe e lembrou que se creará un corredor que conecta a estación de Guixar coa de Urzaiz e chega ata a zona alta da cidade. "En Vigo agora xa só hai unha estación", destacou.

"Permitimos con isto que estamos facendo que se alguén vén e queda na estación de Guixar e ten que subir cara ao Halo e cara á estación de Urzaiz ten un medio mecánico", sinalou Caballero. Ademais, fixo unha comparación coa terminal T4 do aeroporto de Madrid, indicando que o tempo que se tarda en ir dunha estación de tren a outra é "menos tempo do que eu tardo en ir dende unha punta da T4 ata a outra".

Aínda queda por instalar outro tramo e de momento non se confirmou a data de inauguración das rampas. Destináronse ás obras 1,6 millóns de euros.