A Patrulla Fiscal e de Fronteiras da Garda Civil de Vigo, no marco das súas funcións de Resgardo Fiscal do Estado e prevención do contrabando, levou a cabo unha serie de intervencións nos últimos meses. Mediante servizos preventivos de análise de risco e inspección de paquetería, lograron interceptar un total de 193 quilos de tabaco picado de orixe ilícita e 50 caixas de tabaco falsificadas.
Segundo informou a Benemérita nun comunicado, toda esta mercancía proviña de vendas realizadas a través de internet e distribuíase mediante envíos de paquetería desde diversas localidades do centro e sur de España. Os destinatarios residían en varios municipios da provincia de Pontevedra.
“"As inspeccións realizadas permitiron localizar múltiples envíos, procedéndose á aprehensión da mercancía, instruíndo as correspondentes actas aos destinatarios, un total de 78, por presuntas infraccións á Lei Orgánica 12/1995, de Represión do Contrabando, remitidas á Dependencia Rexional de Aduanas e Impostos Especiais de Pontevedra, ás que se engade outro elemento, e é o modo de adquisición das labores de tabaco, é dicir, fóra do circuíto legalmente establecido."
Ademais, 12 dos paquetes interceptados procedían dun provedor con domicilio en Carabanchel (Madrid) e outros 20 dun provedor con residencia en Valencia. Ambos os provedores están sendo investigados por outras Unidades Fiscais da Garda Civil en relación con envíos a outras provincias españolas. O valor da mercancía incautada no mercado legal ascendería a 32.810 euros, mentres que os denunciados a adquirían por 6.594,69 euros, o que implica unha importante defraudación de impostos a Facenda.
Os 78 destinatarios denunciados residen en localidades como A Cañiza, Crecente, Ponteareas, A Guarda, Salvaterra de Miño, O Rosal, Tomiño, Baiona, Nigrán, Gondomar, Mos, Salceda de Caselas, O Porriño, Vigo, Redondela, Soutomaior, Cangas, Moaña, Marín, Bueu, Pontevedra, Combarro, Ribadumia, Sanxenxo e Caldas de Reis.
