A xuntanza, celebrada na Reitoría do campus vigués, serviu como primeira toma de contacto entre ambos os dirixentes tras a recente toma de posesión de García Mateo. O obxectivo principal foi abordar a defensa da universidade pública, un punto de encontro clave para as súas respectivas institucións.
Carmen García Mateo cualificou o encontro de "moi positivo" e sinalou que "foi un pracer recibir a José Ramón Gómez Besteiro na Universidade", destacando a importancia de "falar basicamente da universidade pública, que é algo que temos que defender todos desde as institucións e as organizacións políticas". Ambas as partes comprometeron a "seguir traballando xuntos".
“"Imos continuar nesa relación que se nos abre coa UVigo para traballar a prol dos estudantes, sobre todo na defensa do público que é o que nos ampara no campo da educación, como no da sanidade que é o que nos ampara a todos e presta os mellores servizos sen saber se temos moito ou pouco."
Pola súa banda, Gómez Besteiro reiterou o compromiso do PSdeG coa universidade pública, afirmando que "estamos volcados en dimensionar, potenciar e mellorar a universidade pública". Anunciou que, ante a fase de renegociación do financiamento, trasladarán á Xunta unha petición para "aumentar o financiamento estrutural ás universidades, que é onde máis o necesitan".
Ademais, o secretario xeral socialista avogou por explorar "novas opcións de vivenda para o alumnado", como a creación de residencias públicas, e a posibilidade de incorporar a gratuidade á primeira matrícula dos mestrados universitarios.
Na visita á reitora da UVigo, Gómez Besteiro estivo acompañado polo voceiro de Educación do PSdG no Parlamento de Galicia, Aitor Bouza Manso.
