A nova infraestrutura busca consolidar a fachada atlántica como un eixo estratéxico para a ciberseguridade da Unión Europea. O proxecto parte da conexión de 120 quilómetros xa operativa entre Santiago de Compostela e Vigo, que agora se prolongará ata Valença do Minho nesta primeira fase, cun investimento de 10,6 millóns de euros.

A iniciativa conta coa participación activa de entidades galegas como o Centro de Supercomputación de Galicia (Cesga) e a Universidade de Vigo, a través do centro de investigación AtlanTTic. O obxectivo final é garantir a protección de servizos críticos como as redes eléctricas, o control do tráfico aéreo e as transaccións financeiras fronte a posibles ataques informáticos.

Ademais da conexión terrestre, o plan contempla o despregamento de enlaces espaciais mediante estacións ópticas, como a instalada no campus vigués, para establecer comunicacións seguras co satélite Eagle-1. A rede europea EuroQCI busca así blindar a confidencialidade das comunicacións gobernamentais e militares en todo o continente.