Este fin de semana, Vigo, Ferrol e Pontevedra adiantarán as súas protestas polo Orgullo LGTBIQ+ ao sábado 28 de xuño. En Ferrol, a marcha comezará ás 12.00 horas dende a Praza Amada García. Mentres, en Vigo e Pontevedra, as mobilizacións están programadas para as 20.00 horas, partindo dende a Praza Fernando Católico e o Parque das Palmeiras, respectivamente.
O domingo 29 de xuño, día oficial do Orgullo, continuarán as manifestacións noutras cidades. Santiago de Compostela será a única que se celebre pola mañá, partindo ás 12.00 horas da Praza 8 de Marzo. Pola tarde, Ourense sairá ás 19.00 dende a Praza Bispo Cesáreo; A Coruña ás 19.30 dende a Praza Ourense; e Lugo ás 20.00 dende a Praza Horta do Seminario. Todas as convocatorias foron impulsadas polas plataformas locais, co apoio de entidades como Avante LGTB+, que reivindicou nas redes "Contra o odio e a cisheteronorma: orgullo combativo, transfeminista e galego".
A manifestación de Vigo desenvolverase nun contexto atípico. A entidade Nós Mesmas anunciou a principios de xuño que este ano non se celebraría a "Festa Diversxs", rompendo unha tradición que se mantiña dende 2009. A organización sinalou "dificultades" crecentes para organizar eventos e un "aumento" dos "gastos importantes" derivados dos requisitos municipais.
A asociación explicou que a súa actual situación económica, agravada pola falta dunha subvención esperada, impídelles asumir o desembolso necesario para organizar a festa. A pesar diso, Nós Mesmas e Avante LGTB+ transmitiron unha mensaxe de continuidade: "O Orgullo continúa. Seguimos saíndo ás rúas. Seguimos facendo comunidade. Seguimos reivindicando dereitos, memoria e futuro".
Noutras cidades, as manifestacións si irán acompañadas de festas que porán o broche a programas de actividades extensos. En Pontevedra, o Parque das Palmeiras acollerá actuacións ao longo do día, con concertos de Kelly Amethyst, Escarlatina Pier, Montedapena e Señora DJ e Gorllitox tras a marcha. En Santiago de Compostela, a festa será o sábado pola tarde na Praza de Mazarelos, con música de O Xoán, Pídechas O Corpo e a drag Amanda Carallo. A Coruña estenderá a súa celebración do Orgullo dende o 5 ata o 12 de xullo, con case trinta artistas actuando na Praza de Pontevedra e nos Xardíns de Méndez Núñez.
